كلنا مرينا في رحلة الدايت.. نبدأ متحمسين ونحسب اننا خلاص بنوصل للجسم المثالي في وقت قصير، بس مع الطريق يطلع فيه عقبات وأخطاء تخلي الواحد يوقف أو يحس بالإحباط. خليني أشاركك أهم الاخطاء اللي تصير مع أغلب الناس وقت الدايت، عشان تكون واعي وتتفاداها وتعيش أسلوب صحي أسهل وأريح.
الحرمان مو هو الحل.
أول خطأ يطيح فيه أي شخص يبدأ دايت هو إنه يقطع كل شي يحبه. يعني فجأة يحذف الحلويات، المشروبات الغازية، الفاست فود.. كأن الحياة كلها صارت بروكلي وصدور دجاج بس. المشكلة هنا إن الحرمان يخلي الجسم والعقل يتمرد، وبعد فترة يصير عندك نهم ورغبة مجنونة تاكل أي شي قدامك. الحل إنك توازن، تاخذ وجباتك الأساسية صحية بس تخلي مجال صغير لأكلة تحبها بدون تأنيب ضمير.
تصديق الدايت السريع.
فيه ناس يدورون على أنظمة "اخسر وزن في أسبوع" أو "رجيم الكيتو السحري". هذا خطأ كبير لأن النزول السريع غالباً مؤقت. جسمك يحتاج وقت عشان يتأقلم، والنزول البطيء هو اللي يثبت. لما تركز على العادات وتغير أسلوب حياتك، النتيجة بتدوم وتكون صحي أكثر.
تجاهل البروتين
كثير يسوون دايت ويحسبون بس السعرات هي كل شي. ينسون إن البروتين أساس في أي نظام، مو بس للرياضيين حتى للي يبغى يحافظ على عضلاته ويحس بالشبع فترة أطول. لما تقلل البروتين تبدأ تحس بالتعب والجوع، وهذا خطأ يخرب عليك النظام فضروري تهتم بالماكروز وراح يكون فيه تفصيل لهم في مقالة قادمة.
التمرين مو عقاب.
في ناس لما ياكلون "وجبة دسمة" يركضون على الجيم عشان يحرقون السعرات وكأن التمرين عقوبة. لا يا صديقي، التمرين جزء من أسلوب حياة صحي، يساعدك تقوي عضلاتك وتعدل مزاجك. اربط التمرين بالمتعة مو بالعقاب.
تجاهل النوم وشرب الماء.
حتى لو أكلك مضبوط، قلة النوم والإهمال في شرب الماء يوقفون نزولك. جسمك يحتاج راحة عشان يحرق دهون ويوازن الهرمونات. والمويه تعتبر أهم عنصر يغفل عنه ناس كثير، مع إن أي دايت ناجح يعتمد على الترطيب الكافي.
الميزان مو كل شي.
الخطأ الشائع إنك تتعلق بالرقم اللي يطلع بالميزان. أحياناً جسمك يشد ويتغير شكله مع التمارين حتى لو الوزن ثابت. ركز على قياسات جسمك وشكل جسمك، على إحساسك بالطاقة، وعلى لبسك كيف صار أريح.
نصائح ذهبية عشان ما تقع في نفس الفخ
-
خلي هدفك طويل المدى مو بس مناسبة قريبة
-
لا تعتمد على الحرمان، كل باعتدال
-
خذ راحتك في رحلة الدايت، لا تستعجل
-
تذكر إن الدايت مو بس أكل، هو نوم ورياضة ومية وصحة نفسية
-
والأهم لا تخلي خطأ بسيط يخليك تستسلم، كلنا نغلط ونعدل
الخلاصة.
الدايت الناجح ما يعتمد على حرمان نفسك ولا على تصديق الوصفات السحرية. أهم شي تبتعد عن الحرمان وتفكر بطريقة متوازنة، لأن كثرة الاخطاء والجري خلف الاشاعات ممكن يخليك تكره فكرة النمط الصحي. خذها خطوة بخطوة وخليها أسلوب حياة ممتع بدل ما يكون حمل ثقيل.
تعليقات
إرسال تعليق